Muga Reserva 2004

 

Kirsuber, appelsínur, sveppir, apótekaralakkrís, reykur. Tunnan stekari en ávöxturinn, bragðið  heilsteypt og fágað. Hæfilega sætt, nægilega súrt til að styðja vel við mat. Örlítil beiskja sem tengist sveppa- og lakkrískeimnum og eflir vínið sem matarvín. Fremur áfengt en sprittið kemur ekki gegn nema allra fyrst. Tannín greinilega til staðar, dálítið þurrkandi án þess að vera ertandi. Sem sagt: Iso-vottað burðarvirki. Meðalfylling, nokkuð langt og mjúkt eftirbragð en ekki alveg laust við ertingu. Þokkafullt vín i góðu jafnvægi. Spánverjar eru snillingar í að þroska vín í tunnum og gætu ýmsir Borðeyrarbændur lært af þeim.  Passar vel með grilluðu lambakjöti, pönnusteiktum kartöflum, papriku og sætum, hvítum lauk. Balsamik og edik drepur vínið svo það er best að sleppa salatinu. Drekkist svalt, byrjið í 15° og látið hitna undir borðhaldinu. Góð kaup, kostar 1749 kr í Fríhöfninni, 2003 árgangurinn fæst í Ríkinu á 2499 kr.

Rauðvín, Spánn, Rioja-hérað

Les Tourelles de Longueville 2004

 

Smakkaði þetta fyrst í kvöldverði hjá stórfyrirtæki í almannaeign. Fannst það grunsamlega gott og smekklega valið. Smellpassaði með lambafilletinu. Með humarsúpunni á undan hafði verið gott Chablis frá La Chablisienne. Ég hugsaði með mér að það væri eins gott að skattgreiðendur fréttu ekki hvað hið opinbera gerir vel við gesti sína.

 

Þá byrjar smakkið: Dökkur þroskaður berjaávöxtur, brómber, svört kirsuber, dimmir jarðartónar, lakkrís, brennd eldspýta, smá tóbak, leður, og reykur. Hér eru varla nokkur sólber eða súkkulaði, en kannski örlar aðeins á sveppum og jafnvel kartöfluremmu í lokin. Bragðstyrkur í meðallagi, ágætt jafnvægi í bragði en tunnan skyggir aðeins á ávöxtinn. Hæfilega þurrt, nægilega súrt til að styðja vel við mat, örlítið beiskt,  tannín eru greinilega til staðar og styrkja beinabygginguna en eru samt mjúk og ekki áberandi, áfangismagni stillt í hóf en það gefur dálitla glóð án þess að skína í gegn. Meðalfylling, mjúkt, sæmilega langt.

 

Góður heildasvipur, ekki margslungið, en í góðu jafnvægi. Uppvöxturinn á vinstibakkanum leynir sé ekki þótt mikið hafi verið notað af hægribakkaþrúgunni Merlot þetta árið. Gott matarvín, frábært með lambi og hörðum ostum.

 

Kostar 2089 kr í Fríhöfninni, góð kaup. 2002 árgangurinn fæst í Ríkinu á 2990 kr og ætti ekki að vera síðri.

 

Rauðvín, Frakkland, Bordeaux-hérað, Pauillac-svæði

 

 

 

 

 

 

 

 

 

 

Delas Hermitage Marquise de la Tourette 2000

Dimmur og dæmalaust góður Hermitage fyrir jólasteikina á viðráðanlegu verði. Þroskuð skógarber, bæði rauð og dökk, og plómur eða sveskjur, svartur pipar, kjöt og reykur. Ekkert lyng. Rauðu berin eru mest áberandi í byrjun og þá bregður líka fyrir beikon- og barbekjúkeim, svo færist dimman yfir, krækiber, brómber, blek. Heilsteypt. Bragðstyrkur í meðallagi, ávöxturinn ennþá nokkuð ferskur, tunnan á bakvið tjöldin, hér er enginn áberandi lakkrís, tjara eða vanilla. Þokkaleg sýra, mjúk tannínin á útleið, hæfileg sæta og beiskja og áfengismagnið bara 13% guðisélof en ekki hálfa leið uppí púrtvínsstyrk eins og tíðkast á sumum nýbýlunum. Meðalfylling, silkimjúkt, langt eftirbragð. Best borið fram í kaldara lagi beint úr nýupptekinni flösku, þolir ekki umhellingu eða að standa lengi í opinni flösku eða glasi, þá gufar elegansinn upp. Hellið bara varlega því vínið er ósíað og töluvert botnfall í flöskunni. Stóð sig vel með andabringu og ætti að henta vel fyrir alla villibráð. Dýrt en samt góð kaup, enginn vínáhugamaður getur látið Hermitage ósmakkað, þessi er ósvikinn, kostar 4.690,- kr í Ríkinu.  

Rauðvín, Frakkland, Rónardalur, Hermitage-svæði

Rosemount Cabernet Sauvignon Show Reserve 1999

Coonawarra-svæðið í Suður-Ástralíu er frægt fyrir að gefa af sér góð rauðvín úr Cabernet Sauvignon-þrúgunni. Svæðið er 15 kílómetra langur og kílómetersbreiður lágur kalksteinsás hulinn rauðum, járnríkum jarðvegi. Góðar vonir voru bundnar við 1999 árganginn, hrávínin voru litsterk, bragðmikil, með dökkan þroskaðan ávöxt, og þétt og mjúk tannín, góða sýru og fremur mikið áfengismagn. Hér var kominn árgangur sem átti að vera þess virði að þroska lengi í dimmum kjallara.....Popp! Nú eru liðin 8 ár og komin tími til að tékka á þessu. Liturinn er orðinn múrsteinsrauður. Bragðið frekar sterkt og margslungið og vel saman runnið: Þroskuð sólber, leður, dökkt súkkulaði og sveppir og fínlegur keimur af  lakkrís, fjólum, appelsínum og reyk (eins og af grasi á báli). Gott jafnvægi milli tunnu og ávaxtar. Örlítið sætt, sýra í tæpu meðallagi, engin beiskja. Tæp meðalfylling, mjúkt, en hvorki þykkt né höfugt. Meðallangt eftirbragð. Komið aðeins fram yfir hámark, ávöxtur og fylling farin að dofna, en bragðið orðið flóknara og jafnvægið betra. Frekar nammivín en matarvín finnst mér. Prófaði það með rocquefort-osti sem var innan seilingar og þótti gott. Sennilega vegna þess að það er ákveðinn sveppakeimur af víninu líka. Merkilegast þótti mér þó dimmrautt botnfallið flöskunni og brákin sem líkist helst mýrarrauða á hálftómu glasi daginn eftir. Járnið í rauðu moldinni í Coonawarra hafði fylgt víninu alla leið. Mjög gott, ber aldurinn með reisn. Kostar 2.200 kr. í Ríkinu, góð kaup.

Rauðvín, Suður-Ástralía, Coonawarra-svæði

Cúmaro Riserva 2004

Cúmaro Riserva 2004 er ferskt, ávaxtaríkt, mjúkt og svo þokkafullt þrátt fyrir ungan aldur að það minnir einna helst á rándýr Bordeaux-vín á svipuðum aldri. Hráefnið (montepulciano-þrúgan) og heimasveitin rétt fyrir sunnan Ancona á Adríahafsströnd Ítalíu gefur yfirleitt ekki af sér svona flottan safa. Galdurinn liggur í metnaðarfullu nostri framleiðandans Umani Ronchi við berjarunnana og tunnurnar í kjallaranum. Kirsuber og vanilla eru mest áberandi í bragðinu en hindber og örlítill lakkrís og eik er líka til staðar. Bragðið er hvorki fjölþætt né flókið en mjög heilsteypt og jafnvægið milli tunnu og ávaxtar er nánast fullkomið. Meðalfylling, dauf tannísk slikja og nokkuð langt eftirbragð með daufum hindberja-, lakkrís- og reykjareimi. Hæfilega þurrt og sýra í meðallagi. Ákaflega vel gert og nútímalegt vín, mjög ólíkt rioja-eðalvínunum sem ég hef verið að mæra að undanförnu. Ágætt matarvín held ég af því að þegar maður drekkur það eitt og sér hvarflar hugurinn í sífellu til ítalskra rétta sem manni langar að búa til en kann ekki. Góð kaup, kostar 2.590 í Ríkinu.

Rauðvín, Ítalía, Marche-hérað, Rosso Conero-svæði, flokkun: DOCG

 

Gömul og góð Riojavín

Hvar fæ ég gömul, mjúk, þroskuð og fáguð rauðvín með áhugavert samsett bragð, ágæta fyllingu, gott jafnvægi og þægilegt, tiltölulega langt eftirbragð? Svar: T.d. í Bordeaux, Búrgúndí eða Piemonte fyrir 3 - 7 þúsund kall, eða í gamla, góða Rioja-héraðinu fyrir ca. 2 þúsund kall. Mér vitraðist þetta þegar ég opnaði flösku af Faustino I 1996 fyrir nokkrum vikum og ákvað þá að kanna fleiri vín af sama tagi. Niðurstaðan er sú að það séu einstaklega góð kaup í Gran Reserva vínum frá Rioja af árgöngunum 1994, 1995 og 1996.

 Ég mæli með eftirfarandi vínum:

• Faustino I 1996
• Coto de Imaz Gran Reserva 1996
• Baron de Ley Gran Reserva 1996 
• Muriel Gran Reserva 1994
• Marqués de Arienzo Gran Reserva 1996

Njóta sín best fremur köld, 16-18°C og passa vel með grilluðu lambakjöti eða nautakjöti, en sósur og annað meðlæti verður að vera einfalt, t.d. sveppir og paprika, ekki feitar sósur eða salatsósur með ediki eða balsamic.   

Rauðvín, Spánn, Rioja-hérað, flokkun: Gran Reserva

Marqués de Arienzo Gran Reserva 1996

Dökk, þroskuð ber, gamalt hey og lakkrís. Ávöxturinn farinn að dofna en tunnan ekki yfirskyggjandi. Frekar milt. Létt fylling, farið að mjókka á tungu, meðallangt eftirbragð með keim af þurrkuðum apríkósum. Þurrt, sýra í meðallagi, tannín mjúk og ekki áberandi. Bragð og bygging í nokkuð góðu jafnvægi, en komið af léttasta skeiði og minna vín en Faustino I 1996, Coto de Imaz 1996, Baron de Ley 1996 og Muriel 1996. Kostar 1890 í Ríkinu.

Rauðvín, Spánn, Rioja-hérað.

Muriel Gran Reserva 1994

Dökkur ávöxtur, brennisteinn, apótekaralakkrís, tóbak, vanilla, gamalt hey, eik og þurrkaðar apríkósur. Frekar bragðstekt en ekki ávaxtaríkt, tunnubragðið (eikarspýta, vanilla, lakkrís) í forgrunni. Meðalfylling og tiltölulega langt eftirbragð með þurrkuðum apríkósum, gömlu heyi og reyk, mjúkt. Þurrt með stamri slikju, sýra í meðallagi. Jafnvægi ekki sérstaklega gott í byrjun, tunnan of áberandi í samanburði við ávöxt og ertir tunguna svipað og brennisteinn á brenndri eldspýtu, en jafnar sig við að standa í opinni flösku ca. 2 tíma og venst vel á tungu. Í fyrstu virðist þetta minna vín en Faustino I 1996, Coto de Imaz 1996 og Baron de Ley 1996, en þegar það hefur fengið að jafna sig koma fínlegri tónar eins og þurrkaðar apríkósur betur fram og það fer að örla á appelsínum og gömlum leðurmublum. Mjög gott vín, kostar 1990 í Ríkinu, góð kaup.

Rauðvín, Spánn, Rioja-hérað.

Baron de Ley Gran Reserva 1996

Dökkur ávöxtur, apótekaralakkrís, hrakið hey, tóbak, eik, brennisteinn, reykur og örlítill keimur af viðarolíu og leðri. Bragðstyrkur í tæpu meðallagi og tunnan (lakkrís, eikarspýta) skyggir dáldið á ávöxtinn í byrjun, en venst vel á tungu. Meðalfylling, tiltölulega langt eftirbragð með lakkrís, hlöðu og reyk og jafnvel þurrkuðum apríkósum, silkimjúkt. Þurrt, sýra í tæpu meðallagi, tannín mjúk og ekki áberandi. Bragð og bygging ágætu jafnvægi þó nokkuð skorti á ávöxt og sýru. Hefur gott af því að standa, jafnvægið batnar og elegansinn kemur betur fram. Nokkuð gott matarvín, en fremur milt bragðið og og tæp sýran þola ekki mjög sterkan mat eða feitar sósur. Prófað með fitusprengdu nautakjöti, einfaldri nautakraftssósu, bökuðum kartöflum og steikri papriku og stóð sig bara vel. Flott vín, kostar 2090 kr. í Ríkinu, góð kaup.

Rauðvín, Spánn, Rioja-hérað. 

Coto de Imaz, Gran Reserva, 1996

Dökk, þroskuð kirsuber, leður, tóbak, lakkrís, hey, nýopnuð vanillustöng. Ávaxtaríkt, bragðsterkt. Rúm meðalfylling, langt eftirbragð með jarðartónum og tjörukeim. Góð sýra gefur ferskan blæ, þurrt. Jafnvægi í byggingu. Er sennilega á toppinum núna, ávöxtur ekkert farinn að gefa eftir. Ávaxtaríkara en Faustino I 1996, en hefur ekki sama virðulega sveitasetursstílinn, blautan hnakk og olíubornar gamlar mublur. Drekkist við 16-18°C, alls ekki of heitt. Mjög gott, kostar 1890 kr í Ríkinu, góð kaup.

Rauðvín, Spánn, Rioja-hérað.