Castello di Querceto Chianti Classico 2005

Hefur góðan ávöxt, sveitakeim og beiskjublæ og er því uppruna sínum trútt. Í meðallagi bragðsterkt, kirsuber, dökkt súkkulaði og örlar á lakkrís. Hæfilega sýruríkt en töluvert stamt. Fylling og eftirbragð í meðallagi. Ungæðislegt og fremur hrátt enda varla tveggja vetra.  Ætti að standa sig vel með ítölskum réttum með bökuðum hvítlauk og tómötum, en mæli með að umhella kröftuglega og láta standa í tvo tíma fyrir mat. Vínnördar geta hins vegar haft gaman af því að finna hvernig tannísk slikjan dofnar hægt og rólega í opinni flösku og glasi og ávöxtur og fylling verður meiri. Kostar 1790 kr í Ríkinu. 

Rauðvín, Ítalía, Toscana-hérað, Chianti Classico-svæði

Quinta do Crasto 2004 Reserva

Ungt, ennþá nokkuð hrátt, bragðsterkt, dökk ber, mikil fylling, langt eftirbragð, dáldið nýjaheimslegt og aðeins of mikil vanilla fyrir minn smekk, en sýruríkt, tannískt, gott jafnvægi, gott matarvín, ætti að vaxa mikið við geymslu. Með bestu portúgölsku vínum sem ég hef smakkað, 2090 kr í Ríkinu, góð kaup.

Rauðvín, Portúgal, Douro-dalur,