Chapoutier Saint-Joseph Deschants 2004

Rúbínrautt með glærri rönd. Ilmur af lyngi, lakkrís og rauðum ávöxtum. Frekar sterkt bragð af rifsberjum, rabbarbara, lakkrís, lyngi og svörtum pipar, ávöxturinn ennþá frekar óþroskaður og saftkenndur. Sólbakað síðdegi í suðurfrans. Meðalfylling, mjúkt og þokkalega langt eftirbragð með örlítið pipruðum lyng- og lakkrískeim. Sýran er í tæpu meðallagi og dregur það aðeins úr ferskleikanum, örlar á sætu, stöm slikja, en tannín eru þroskuð og mjúk. Bragðstyrkurinn og ákveðið lakkrísbragðið gefur dimman og dáldið krefjandi blæ. Gott matarvín. Passar ágætlega með jurtakrydduðum plokkfiski í tartalettum með loki úr geitosti. Ágætt líka með beikoni og ólívum í hvítlauksolíu, en þolir illa edik og balsamic. Tilbúið til drykkju en þolir nokkur ár í viðbót. Kostar 2.490 kr í Ríkinu.

Rauðvín, Frakkland, Rhône-dalur, Saint-Joseph svæði, á vesturbakka árinnar milli Mauves og Tournon og beint á móti Hermitage.

Faustino I 1996

Svört kisrsuber, krækiber, blautur hnakkur, píputóbak, heystabbi í útmánuði, olíuborinn mahogniviður... runnið saman í eina heild sem minnir á menningarlegt sveitasetur eða klaustur, jafnvel Flateyjarbók. Mikil fylling, langt eftirbragð með dimmum jarðartónum. Þriggja ára geta vín verið fersk, frökk og falleg, en þegar vel gerð vín úr góðum árgangi eru farin að nálgast fermingaraldur verður til eitthvað nýtt sem lyftir þeim í æðra veldi. Ávöxtunarkrafa víniðnaðarins otar að okkur alls kyns ungum tískuvínum. Það getur verið skemmtilegt og tilbreytingarríkt, en við ættum ekki að láta það rugla okkur í ríminu og gleyma því hvað þroskuð eðalvín eru fáguð og góð (vandinn er bara sá hvað þau eru fjandi dýr). Hugurinn hvaflar til Gunnars Gunnarsonar og Skriðuklausturs (ég man nú reyndar ekki hvort gamli maðurinn smakkaði það yfirhöfuð). Faustino I 1996 er því himnasending, Château Ausone á tilboði í Bónus. Silkimjúkt, þurrt, sýruríkt og ferskt. Með þessu víni þarf að vanda valið á matnum. Ég mæli með grilluðu frampartsfilleti (eða eins og ameríkaniseraðir kjötiðnaðarmenn vorra daga segja: lamba rib eye. Hvar eru nú orðanefndirnar!?). Krydda vel með sjávarsalti og nýmöluðum svörtum pipar og sleppa öllu öðru meðlæti nema kannski smá flís af hvítlaukssmjöri. Besta vín sem ég hef smakkað á árinu. Kostar 1990 í Ríkinu, frábær kaup.

Rauðvín, Spánn, Rioja-hérað, flokkun: Gran Reserva  

 

 

Château Suduiraut Sauternes 2002

Glæsilegt og fjölhæft eftirréttavín. Bitter appelsínumarmelaði, apríkósur, hunang, og beiskir eplasteinar. Bragðsterkt, höfugt, þykkt, mikil fylling og langt eftirbragð. Að sjálfsögðu mjög sætt, en beiskjan og þokkaleg sýra vinna vel á móti og lyfta því um margar hæðir. Frábært með köldu, frísku, sýrumiklu ávaxtasalati t.d. úr eplum, appelsínum og perum og ekki skaðar að hafa sítrónufrómas með. Smellpassar líka með gæsa- og andalifrarkæfu og rocquefort-osti. Algjört nammivín fyrir nammigrísi og hinir lyfta brúnum og brosa líka. Dýrt, kostar 5.190 kr í Ríkinu, en hér er um að ræða einn af risunum í franskri víngerð, geymist vel í ísskáp.

Sætt hvítvín, Frakkland, Bordeaux-hérað, Sauternes-svæði, flokkun: Premier Cru Classé  

D'Arenberg Hermit Crab 2004

Apríkósur, rjómakaramellur og smá rabbabari og hvannarrót. Góð fylling og eftirbragð, áfengt og dáldið feitt, merkjanlegur beiskjublær, en mjög gott jafnvægi milli sýru, sætu og beiskju. Smellpassar með krabbakjöti, gott með humri í hvítlaukssmjöri, gengur þokklega með með skötusel og smokkfiski í mildri karrísósu (en stendur þar ekki Alsace gewürztraminer á sporði), passar alls ekki með gufusoðnum aspas (með honum þarf víst sauvignon blanc). Mjög gott hvítvín, franskur uppruni, áströlsk útfærsla, kostar 1600 kr í Ríkinu, góð kaup.

Hvítvín, Suður-Ástralía, McLaren-dalur.

Guelbenzu Lombana 2005

Kirsuber, leður, tóbak og nýtt hey er það fyrsta sem kemur í hugann. Hefur göngulag eins og bóndi frá Rioja en fötin eru örugglega úr Zara. Passar með grilluðu lambi, júróvisjón og kosningum um helgina. Bragðsterkt, með miklu berjabragði, sem ennþá er dáldið hrátt eins og af nýrri saft. Langt eftirbragð með jarðartónum og dökkum pipar. Meðalfylling, mjúk en samt örlítið krydduð. Góð sýra, smá stemma, greinileg eik, en ekki yfirþyrmandi, engin vanilla, gott jafnvægi. Kostar 2.490 kr í Ríkinu.

Rauðvín, Spánn, Aragón-hérað, Ribera del Queiles-svæði, flokkun: Vino de la Tierra, þrúgur: 27% graciano, 24% tempranillo, 20% syrah, 15% merlot, 14% cabernet sauvignon, þroskun: frönsk og amerísk eik til helminga í 10 mánuði, frekari upplýsingar: www.guelbenzu.es

Château Greysac 2003

Enginn aristókrat, en gildur Borðeyrarbóndi og góður fulltrúi fyrir sína sveit. Tjara, lakkrís, gúmmí, brennisteinn, kirsuber(?), sólber(?), alla vega dökk ber, ósultuð, en frekar dauf. Tæp meðalfylling, mjúk, hvelfist yfir alla tunguna, tiltölulega langt eftirbragð með tjörukeim og jarðartónum. Hæfilega sætt, sýra með minna móti enda heitt þetta sumar, örlar á einhverri beiskju, eins og úr berjahrati eða apótekaralakkrís, tannín nokkuð þroskuð og mjúk en samt smá stemma. Tjaran, brennisteinninn, beiskjan og sýruskorturinn valda dálitlu ójafnvægi í byrjun, en allt eru þetta eðlileg blæbrigði og vínið vex við að standa og venst vel á tungu. Tilbúið til drykkju. Stóð sig vel með lambakjöti og ætti líka að passa með nautakjöti og dökku fuglakjöti. Miðað við verð er þetta merkilega gott vín sem tekur ekki ofan fyrir neinum verksmiðjuframleiðendum úr nýja heiminum. Kostar 1550 kr í Ríkinu.

Rauðvín, Frakkland, Bordeaux-hérað, Médoc-svæði, flokkun: Cru Bourgeois Supérieur. 

Mourgues du Grès Terre d'Argence 2004

Krækiber, lyng, kryddjurtir, tjara, pipar. Mikil og mjúk fylling en samt heitt og kryddað eftirbragð. Áfengt, þykkt, dáldið sætt, smá stemma, örlar á beiskju í ætt við krækiberjahrat, góð sýra, virkar lítið eikað þótt tjörukeimurinn bendi til annars, sprittið kemur í gegn, matarleg uppbygging, fínt jafnvægi. Kostar 1900 kr. í Rikinu. Góð kaup. - Sem sagt: Suðurfrönsk sveitasæla. Af hverju búum við hér?

Rauðvín, Frakkland, Languedoc-hérað, Costières de Nimes-svæði

Prunotto Barbaresco 2000

Leður, tóbak og sveit. Mjúk meðalfylling og langt eftirbragð með tjörukeim. Áfengt og fremur þurrt, örlítið stamt, sýra í meðallagi, eik ekki áberandi, sprittið kemur soldið í gegn, en allt í góðu jafnvægi. Ávöxtur ógreinilegur og fjólurnar sem maður vonast til að finna í svona víni hafa sennilega verið gefnar öðrum. Hvorki bragðsterkt né öflugt, en þokkafullt og glóðin sem það skilur eftir í munni lyftir því um þrep. Kostar 2790 kr. í Ríkinu.

 Rauðvín, Ítalía, Piemonte-hérað, Barbaresco-svæði.

Tommasi Ripasso 2004

Kirsuber, leður og fjós. Frekar bragðsterkt, áberandi beiskjublær örlar á sætu, ákveðin sýra, mjúk tannín, ennþá dálítið stamt, en í heildina í góðu jafnvægi. Meðalfylling, góður eftirkeimur. Tilbúið til drykkju þrátt fyrir ungan aldur, ætti samt að þola nokkur ár í viðbót. Beiskjan og sýran vinna vel með mat, mér dettur í hug speltpizza með geitosti og hvílauk, en ætti líka að geðjast þeim sem fíla gráðost, brauðsúpu og skötu. Líka fínt sem nammivín, ekki þó á sólpallinn, frekar í lágvært spjall í veiðkofanum eftir kalsadag í sjóbirtingi. Með betri kaupum í Ríkinu, kostar 1850 kr.

Rauðvín, Ítalía, Veneto-hérað, Valpolicella Classico-svæði    

Châteauneuf-du-Pape La Bernadine 2004

Krækiberja- og lyngtónar og tjöru- eða lakkrískeimur. Góð fylling og langt, örlítið kryddað eftirbragð. Smellpassar með íslensku lambi elduðu með miklum hvítlauk og kryddjurtum. Gengur líka vel með ólífu-hvítlaukssnakki og þroskuðum, hörðum ostum. Áfengt, fremur þurrt, sýruríkt og passlega beiskt og hefur þessvegna góða beinabyggingu, en er ennþá of stamt og vantar margslunginn fínleika sem bara fæst með margra ára íhugun í dimmri geymslu. Mæli með umhellingu ef drekka á með mat. Kostar 3.290 kr í Ríkinu.

Rauðvín, Frakkland,  Rhône-dalur, Cháteauneuf-du-Pape svæði.